Nederlandlingvaj   ĵurnal-artikoloj

tradukitaj en Esperanton
fare de Toon Witkam


fonto:
la Nederlanda ĵurnalo NRC
https://www.nrc.nl/nieuws/2017/12/22/man-die-google-groot-maakte-doet-stap-terug-a1585980
tradukis ĝin (el la Nederlanda en Esperanton) Toon Witkam

La viro kiu faris Googlon granda, foriras

Eric Schmidt, sub kies gvidado Google fariĝis unu el la plej grandaj teĥno-entreprenoj de la mondo, rezignas sian estrarfunkcion ĉe Google.

NRC 23 decembro 2017

 

Fare de nia redaktoro
Wouter van Noort   

 

Kvankam Eric Schmidt estas la viro sub kies gvidado Google kreskis, kiam li vizitis Eŭropon li daŭre ricevis pli da ĝenaj demandoj pri la enorma amplekso de la Usona teĥno-entrepreno. Ĉu ne koncentriĝis tro da potenco ĉe malgranda klubo de teĥno-gigantoj? Ĉu Google ja sufiĉe zorgeme traktas privatec-sentemajn datumojn? Kaj ĉu la konzerno pagas imposton honeste? 

En oktobro, ĉe konferenco en Hago, Eric Schmidt pri tio diris: "Rigardu. Venos baldaŭ granda nova Eŭropa direktivo sur la tereno de privateco. Ni normale direktos nin konforme al tio. Kaj rilate al impostoj: ni plenumas ĉiujn leĝojn. Se tiuj leĝoj estas ŝanĝataj, ni amplene direktas nin laŭ tio. Se vi ne ŝatas tro da potenco, la plej bona maniero por trakti ĉi tion estas: konstruu viajn proprajn grandajn teĥno-entreprenojn. Sekvan demandon, bonvolu." 

Ĵaŭde Schmidt anoncis sian eksiĝon kiel executive chairman. Inter 2001 kaj 2011 li estis estrar-prezidanto de Google. La Google-fondintoj Sergey Brin kaj Larry Page venigis lin en 2001 ĉe sia entrepreno, pro liaj jaroj da sperto kiel gvidanto ĉe teĥno-entreprenoj Sun Microsystems kaj Novell. Tio manifestiĝis kiel ora ago, kiu faris de Google entreprenon senkomparan, kaj konfirmus por ĉiam la teĥno-reputacion de Schmidt.

 

Google elkreskis en tiu periodo ĝis la sukcesplena teĥno-kompanio kiu ĝi nun estas. Sub sia gvidado ĝi ankaŭ dediĉis sin al la ampleksa gamo de teĥnologioj en kiuj ĝi nun estas granda: de mem-veturantaj aŭtoj ĝis artefarita inteligenteco. 

En 2010 Schmidt engaĝiĝis en diskuto kun Sergey Brin pri la rolo de Google en Ĉinio. Brin volis ke Google retirus siajn servojn el Ĉinio, ĉar la entrepreno ne rajtis konformi sin al la strikta cenzuro. Schmidt antaŭ ĉio vidis eblecojn por rompmalfermi la Ĉinan merkaton, sed estis revokita de Google-fondintoj. 

En 2011, Larry Page reprenis la rolon de pintulo. Schmidt fariĝis executive chairman, funkcio kiu similas al tiu de prezidantkomisaro. En tiu rolo, li vojaĝis al multaj urboj kaj landoj por kampanji pri interesoj de Google, ankaŭ multe en Bruselo, ĉe la Eŭropa Komisiono. En 2013 li verkis la furorlibron The New Digital Age, pri la enormaj promesoj de ciferecigo. 

Sed ne ĉiun li povis konvinki. Ĉe la Eŭropa Komisiono li ricevis la neeviteblajn tedajn demandojn pri privateco-aferoj, potenc-koncentriĝo kaj impostoj, lastatempe daŭre pli ofte. 

Lia lobia laboro por Google kaj patrina entrepreno Alphabet ne estis nedividita sukceso. Dum la lastaj jaroj Google ekhavis inter aliaj grandan monpunon pro misuzo de potenco de la Eŭropa Komisiono, kaj ĝi malbone akordiĝas kun diversaj landoj pri la pagado de impostoj. La socia tajdo ŝajnas krom tio turniĝi kontraŭ teĥnologiaj kompanioj kiel Google. Tiun tendencon Schmidt ne ĝisatendas. 

"Dum la lastaj jaroj mi dediĉis multan tempon al scienco, teĥnologio kaj bonfarado", Schmidt skribas en gazetara komunikaĵo. Li ja restas kiel konsilanto de Alphabet, la patrina entrepreno de Google, sed li nun faros pli da tempo por tiuj aliaj hobioj. Lia sekvanto estas ankoraŭ ne konata.

 

 

 

Ĉiuj artikoloj   |  




© januaro 2018 Toon Witkam | Powered by RosyGrass
Hosted by Bluehost.com