Nederlandlingvaj   ĵurnal-artikoloj

tradukitaj en Esperanton
fare de Toon Witkam


fonto:
la Nederlanda ĵurnalo Volkskrant
https://www.volkskrant.nl/opinie/mitteleuropa-heeft-de-wil-tot-cultureel-overleven-die-west-europa-heeft-verloren~a4540664/
tradukis ĝin (el la Nederlanda en Esperanton) Toon Witkam

La reveno de ‘Mitteleuropa’

Volkskrant 22 novembro 2017

 

Opinio-kolumno fare de
Derk Jan Eppink

 

Germanio flosas nedirekteble en Eŭropo, sed en ‘Mitteleuropa[i] sufokiĝas post la venko de la Aŭstra politikisto Sebastian Kurz (31). ‘Mitteleuropa’ origine estas kultura koncepto ene de la limoj de la iama Habsburga Imperio. Tiu termino reviviĝas nun kiel ‘koalicio de landoj’ kiu sin turnas kontraŭ la Eŭropa enmigrad-politiko, de Germana farmaniero.

La Hungaran ĉefministron Viktor Orbán oni povas ĉesigi kiel 'potenculon ĉe la Danubo'. Sed la Aŭstran Sebastian Kurz ne. La Ĉeĥa Respubliko kaj Slovakio estas feliĉaj kun li. La ĉiam ribelema Pollando ankaŭ. Baldaŭ parolos Aŭstra ĉefministro en Bruselo ankaŭ nome de ‘Mitteleuropa’.

Kaŭzo de ĉi tiu koalicio estis la rifuĝint-torento al Germanio en 2015. La Slovaka politikisto Richard Sulik, membro de la Eŭropa Parlamento, akuzis kancelieron Merkel pro "disvastigi ĥaoson tra Germanio kaj ‘Mitteleuropa’". Sulik, kiu parolas perfekte la Germanan, aperis en Germanaj talkshows kaj donis al Martin. Schulz, tiama prezidanto de la Eŭropa Parlamento, malmolegajn riproĉojn.

Schulz provis formeti Sulik-on kiel krudulon el Slovakio. Sed la Slovako estis trafinta kordon.

 

Orbán estis en Germanio la propeka kapro, pro tio ke li lasis meti kradojn por haltigi la rifuĝint-torenton. Orbán faris kion la Germanoj mem estis devintaj fari, sed por kio ili mense estis nekapablaj. En Berlino regis morala indigno, krom ĉe la Bavara CSU[ii] kiu vidis en Orbán gardanĝelon.

Pollando turnis sin akre kontraŭ deviga kvoto por azilserĉantoj. La Slovaka (socialisma) ĉefministro Robert Fico deklaris: "La Islamo ne meritas lokon en Eŭropo". Pro tio li estis por diskuto vokita de Eŭropaj socialistoj. Andrej Babis, gajninto de lastatempaj elektoj en la Ĉeĥa Respubliko, estas furioza kontraŭulo de la Eŭropa enmigrad-politiko. Li volas Slovenojn kaj Kroatojn kunvenigi ĉe la koalicio.

Prenu la mapon de Eŭropo kaj oni povas vidi la konturojn de la Habsburga Imperio. La venko de Kurz estas la kremo sur la glaciaĵo. En Bruselo prezentiĝas ne hordo da fruktkultivistoj el Oriento, sed la voĉo de ‘Mitteleuropa’. Voĉo kiu ankaŭ alparolos multajn Okcident-Eŭropanojn.

 

‘Mitteleuropa’ havas la volon kulture postvivi, kiun Okcident-Eŭropo estas perdinta

 

Dum longa tempo la termino ‘Mitteleuropa’ ŝajnis morta kaj enterigita. La Habsburga Imperio reprezentis 'Vielfalt' de popoloj, lingvoj kaj kulturoj kun verkistoj kiel Franz Kafka, kaj ankaŭ Vieno kun melankolio. Stefan Zweig priskribis en sia Die Welt von Gestern la foriron de Karlo I, la lasta Aŭstra imperiestro, sur la limo inter Aŭstrio kaj Svislando. La lasta heredanto ŝajnis esti Otto von Habsburg, la lasta kronprinco de la duobla monarĥio, kaj membro de la Eŭropa Parlamento. Por la Bavara CSU.

Kiam la Ĉeĥoj, Slovakoj, Poloj kaj Hungaroj fariĝis EU-membroj en 2004, estis ĉefe reciproka frotado. La Visegrad-koalicio kiu devis ligi ĉi tiujn novajn membroŝtatojn, estis malforta. Sed 2015 alportis la totalan ŝanĝiĝon. La minaco de amasa ne-okcidenta enmigrado revivigis la malnovan komunan kulturon. ‘Mitteleuropa’ revenas kiel politika koncepto.


Grava fariĝas la rilato inter ‘Mitteleuropa’ kaj Berlino kaj Bruselo. Kaj la partio de Kurz kaj tiu de Orbán estas membroj de la Eŭropa Kristana Demokratia Grupo (EPP[iii]). Same kiel la CDU de Merkel. Por Germanio fariĝas pli malfacile, riproĉprediki landojn el Mez-Eŭropo pro tio ke ili ne faras tion kion la EU postulas. La kvotigo-plano por la deviga disdivido de azilo-serĉantoj preskaŭ mortas. Samtempe, la EU simple daŭrigas 'eskorti migrantojn' el Afriko, por disvastigi ilin tra Eŭropo.

Mitteleuropa’ havas la volon kulture postvivi, kiun Okcident-Eŭropo estas perdinta. Okcident-Eŭropo relativigas sian kulturon. Mez-Eŭropo absolutigas.


Okcident-Eŭropo jam ne plu konas sian historion: en Mez-Eŭropo la 'Sieĝo de Vieno' (1683) estas ankoraŭ freŝa en la memoro. Voĉdonantoj en Okcident-Eŭropo ribelas ĉe la voĉdonbudo kontraŭ troa enmigrado; Mez-Eŭropo rikoltas ampleksan publikan subtenon por la strikta migrado-politiko. Eĉ la Hungara verkisto György Konrad pro tio laŭdas Orbán-on.

Germanio, ankrolando de Eŭropo, estas vaganta post la seniluziigaj Bundestag-elektoj. Germanoj ne kapablas bone interrilati kun 'necertecon'. Al la Germana politika elito mankas ĉiu kultura mem-konfido.

Sed Orienta Germanio pri enmigrado pensas same kiel Mez-Eŭropo, inkluzive de Bavario. 'Mitteleuropa' strekas novan romplinion tra Eŭropo. Voĉo kiu sonas pli laŭta, laŭgrade kiom Berlino sian aŭtoritaton perdas.

 

 

Derk Jan Eppink  estas senior fellow ĉe la London Policy Center en New York

 

 

 

[i]Mitteleuropa’ = estas la Germana vorto por 'Mez-Eŭropo'

[ii] CSU = Kristan-Sociala Unio (konservativa partio en la Germana federacia lando Bavario)

[iii] EPP = European People's Party = Eŭropa Popola Partio     vidu ankaŭ:
   https://epo.wikitrans.net/Edward_McMillan-Scott

 

 




Ĉiuj artikoloj   |  




© decembro 2017 Toon Witkam | Powered by RosyGrass
Hosted by Bluehost.com