Nederlandlingvaj   ĵurnal-artikoloj

tradukitaj en Esperanton
fare de Toon Witkam


fonto:
la Nederlanda ĵurnalo Volkskrant frontpaĝo
https://www.volkskrant.nl/binnenland/generaal-nederland-kan-digitale-dreiging-niet-aan~a4513708/
tradukis ĝin (el la Nederlanda en Esperanton) Toon Witkam

Nederlando ne kapablas rezisti ciferecan minacon

Nederlando devas rapide starigi novan organizon por surmapigi eksterlandajn minacojn, kiel manipulado kaj influado per trompaĵ-novaĵo. La minaco, precipe el Rusio, superfortas la ministerion de Defendo kaj la informservojn.

Volkskrant frontpaĝo 29 aŭgusto 2017

 

Fare de Huib Modderkolk kaj Frank van Zijl

 

Ĉi-tion diras hodiaŭ brigado-generalo Wilfred Rietdijk, strategia konsilanto pri Nacia Sekureco kaj Kibernetiko ĉe la ministerio de Defendo, en intervjuo kun la Volkskrant. Rietdijk pledas por centra agentejo kiu daŭre observas kiamaniere la demokratio estas subfosata de eksterlandaj fortoj. "Ekde nun ni pli bone atentu kaj detektu." Laŭ li, la teĥnikoj uzataj en moderna militado, kiel falsaj novaĵoj, superfortas sian departementon.

Rietdijk ankaŭ proponas kunlaboradon inter publikaj instancoj kaj gravaj amaskomunikiloj. La publikaj instancoj povus ĉe novaĵoj diri kiugrade tiuj estas kontrolitaj. Rietdijk: "Amaskomunikilaro povas indiki tion ĉe sia sciigado. Tiam ni starus pli forte kontraŭ malinformado." Rietdijk mencias kiel ekzemplon la sciigon pri seksperforto de Rusa knabino fare de rifuĝintoj en Germanio. Tio kaŭzis agitiĝon kaj protestojn en Germanio, sed ĝi evidentiĝis malvera. La publikaj instancoj devus refuti tion pli frue.

En majo, la Scienca Konsilio por Registarpolitiko (WRR[i]) rekomendis starigi Nacian Sekurecan Konsilion laŭ Usona modelo, sub la gvidado de la ĉefministro kaj kun delegitoj pri Defendo, Eksterlandaj Aferoj, Evolukunlaborado, kaj Sekureco kaj Justico. La pledo de Rietdijk, kiu volas ankaŭ centralizon de la sekureca politiko, aliĝas al tio.



Publikaj instancoj kaj amaskomunikilaro kunkune estos pli potencaj kontraŭ malinformado’



Same kiel aliaj okcidentaj landoj, institucioj kaj entreprenoj en Nederlando ĉiutage troviĝas en la paflinio de miloj da hackers el Rusio, Ĉinio kaj landoj kiel Irano kaj eĉ Sudano. Nederlanda misio en Litovio, parto de la NATO-ĉeesto en la Baltaj ŝtatoj, estas daŭre koncernataj kun hack-klopodoj de sistemoj fare de la Rusoj, diras Rietdijk.

Pro ĉiuj novaj teĥnikoj, la okcidenta mondo perdis sian grandan superecon kompare al oponantoj kiel Rusio, Ĉinio kaj Irano. Tiuj landoj, pere de ciferecaj teĥnikoj, koncentriĝas en la malfortajn flankojn de okcidentaj socioj. Rietdijk parolas pri "hibrida konflikto, permanente praktikata, kiu konas nek komencon nek finon". Kiel ekzemplo, la generalo mencias la sciigadon pri MH17, ĉe kiu Moskvo provis manipuli Nederlandajn civitanojn.

Ĉi-tiun informo-militon Rietdijk vidas kiel tre minacan por la demokratio. La konfido de civitanoj estas daŭre elprovata, kaj la polarigo estas instigata de falsaj mesaĝoj. La integriĝo kaj la islamo estas laŭ Rietdijk la plej fragilaj temoj en la Nederlanda socio. Rietdijk: "Oni pripensis pri malfortaj flankoj en nia sistemo".


Defendo-spertisto Ko Colijn, asociita al la instituto Clingendael[ii], rekonas la bezonon de centraligo de sekureco. "Ĉe sekureco ekzistas totala kunfluado. La publikaj instancoj devas esti aktivaj sur multaj terenoj  –  klimato, cyber, amasa enmigrado, terorismo, amara malegaleco, ekonomia defendkapablo". La NCTV[iii], ŝarĝita kun batalado de terorismo, nun ludas ĉiam pli grandan rolon. Sekureca konsilio, kiu ankaŭ reprezentas la ministerion pri Edukado, devus tion antaŭzorgi. Colijn konsideras 'verŝajna' ke, dum la nuntempa formado de nova ministraro, ĉi-tio estas sur la tablo.

Pri la 'Rusa propagando', Colijn estas skeptika: "Tion mi trovas iomete hype. Eksterlanda enmiksiĝo en elektoj estas nenio nova, nur la rimedoj estas malsamaj. Krome, la Usonanoj faras ĝin pli ofte ol iu ajn."

 

 

 

[i] WRR (Wetenschappelijke Raad voor het Regeringsbeleid ) = Scienca Konsilio por Registarpolitiko en Nederlando

[ii] Clingendael , vidu: https://www.clingendael.nl/

[iii] NCTV (Nationaal Coördinator Terrorismebestrijding en Veiligheid) = organizo de ĉirkaŭ 300 kunlaborantoj, kiu protektas Nederlandon kontraŭ minacoj kiuj povas malstabiligi la socion

 

 

 

Ĉiuj artikoloj   |  




© septembro 2017 Toon Witkam | Powered by RosyGrass
Hosted by Bluehost.com